今夜黛玉身子松爽，异常疲倦，撇去了胡思乱想，自然一横就着。直睡至午后起身，犹觉神思昏昏。阿金伏侍他梳头，忽然说起一件事道：“奶奶，我今朝早晨头，走到楼下底去，听得倪道伙里勒浪讲一件新闻，说是老爷转来讲格，的确是真格呀！”黛玉道：“啥格新闻介？真来勿真，也说出来。”阿金道：“我来告诉，就是抛球场蔡家（家读夹）里格姨奶奶，前日仔夜里向，带仔一个大姐来逃走脱哉呀！”黛玉道：“说明白，阿就是蔡谦良旧年八月半讨格金巧林介？”阿金道：“正是正是！蛮对蛮对！金银首饰卷仔勿少去笃！据说有格物（读末）事，才是预先运出去的。难末到仔昨日，蔡家里格位老爷差仔几化下底人到四面去寻，落里寻得着？只少拿租界要翻转来，总归影迹全无。勿知明朝阿要报捕房格！”黛玉道：“勿是奴说现成闲话，奴老早晓得俚要逃走格哉。不过实梗样式逃仔出去，弄得出头勿得，除脱到别场化去躲避，呒不别格方法。叫奴末勿实梗格，要出去末，老老实实，对俚当面说明白仔，勿怕俚关杀仔奴。”阿金道：“错是不错。不过格种事体，要做出来看格，好说明格自然说明，勿好说明格也实梗说明白仔。就算让出去，弄剩一个光身体，一点物事弗许拿，哪哼出去过日脚介？”黛玉听他议论，也是有理，惟我另有主意决不与那巧林一样的。